Астанада өткен республикалық аламан бәйге 8,5 мыңнан астам көрермен жинады

Астанада өткен республикалық аламан бәйге 8,5 мыңнан астам көрермен жинады

Ұлттық спортқа деген қызығушылық жылдан-жылға артып келеді. Астана маңындағы «Қазанат» ипподромында Мемлекеттік рәміздер күні мен Құрбан айт мерекесіне орай ұйымдастырылған республикалық аламан бәйге бұған тағы бір мәрте дәлел болды.

Ауқымды додаға еліміздің түкпір-түкпірінен келген шабандоздар мен жүйрік аттар қатысып, көрермендерге ерекше әсер сыйлады. Ұйымдастырушылардың мәліметінше, жарысты тамашалауға 8,5 мыңнан астам адам жиналып, ипподромдағы трибуналар мен көрермен аймақтары лық толған.

Бәйге бағдарламасы бойынша қатысушылар «Құнан бәйге» (9 км), «Топ бәйге» (16 км) және «Аламан бәйге» (25 км) санаттарында бақ сынады. Жарыс барысында ұлттық ат спортының шынайы рухы мен қазақтың ежелден келе жатқан дәстүрлері кеңінен насихатталды.

Жеңімпаздар мен жүлдегерлерге қомақты ақшалай сыйлықтармен қатар екі автокөлік пен бір бөлмелі пәтер табысталды. Бұл ұлттық спортты қолдауға және шабандоздарды ынталандыруға бағытталған маңызды қадамдардың бірі болды.

Мұндай шаралар тек спорттық бәсеке ғана емес, ұлттық құндылықтарды дәріптейтін, халықтың бірлігін нығайтатын және жас ұрпақты салт-дәстүрге баулитын маңызды алаңға айналып келеді.

Rakursinfo.kz Ұлттық рухты ұлықтаған дүбірлі дода — елдік пен дәстүрдің жарқын көрінісі. 🇰🇿🐎