Елордалық медицина университетінде жаңа Конституцияның негізгі ережелері талқыланды

Елордадағы «Астана» медицина университетінде елдің жаңа Конституциясының негізгі ережелері мен олардың денсаулық сақтау жүйесі үшін маңызын түсіндіруге арналған ақпараттық-түсіндіру кездесуі өтті, деп хабарлайды қала әкімдігінің ресми сайты.

Ашық диалогқа университет оқытушылары, ғылыми қызметкерлер, оқу орны әкімшілігінің өкілдері және болашақ медицина мамандары қатысты.

Іс-шара спикерлерінің бірі – университеттің сот медицинасы және құқық кафедрасының аға оқытушысы Гүлмира Базарова. Ол Конституция құқықтық мемлекеттің іргетасы болып қала беретінін, азаматтардың негізгі құқықтары мен бостандықтарын айқындайтынын және денсаулық сақтау мен білім беру салаларын қоса алғанда, әлеуметтік саланың дамуына негіз болатынын атап өтті.

Кездесу барысында қатысушылар 1 шілдеден бастап күшіне енетін өзгерістерге ерекше назар аударды. Спикердің айтуынша, жаңартылған нормалар Негізгі заңның жекелеген баптарына түзету енгізіп қана қоймай, азаматтардың құқықтары мен кепілдіктерін нақтылай түсетін маңызды мазмұндық өзгерістерді де қамтиды.

Медицина қауымдастығы үшін ең маңызды жаңашылдықтардың бірі – азаматтардың денсаулығын қорғау және медициналық көмек алу жөніндегі конституциялық құқығын нақтылау болды. Сарапшының сөзінше, жаңа редакцияда мемлекет қаржыландыратын медициналық қызметтерді алу кепілдіктері нақтырақ айқындалған.

«Денсаулықты қорғау құқығы конституциялық маңызды кепілдіктердің бірі болып қала береді. Жаңа ережелер мемлекет есебінен көрсетілетін медициналық көмектің көлемін нақтылауға мүмкіндік береді. Бұл мемлекеттік саясаттың әлеуметтік бағытын күшейтеді», – деді спикер.

Кездесу барысында отбасы институтын қорғау мәселелері де қозғалды. Қатысушыларға неке теңдігі, ерлер мен әйелдердің тең құқығы қағидатын бекітетін нормалар түсіндірілді. Бұл ережелер отбасы құндылықтарын нығайтуға және барлық азамат үшін тең мүмкіндіктерді қамтамасыз етуге бағытталғаны атап өтілді.

Жеке тұлғаның құқықтық кепілдіктеріне арналған бөлім де талқыланды. Атап айтқанда, азаматтардың өзіне қарсы куәлік бермеу құқығы және білікті заң көмегін алу кепілдіктері қарастырылды. Сарапшылардың пікірінше, бұл нормалардың адам құқықтары мен бостандықтарына арналған бөлімге енгізілуі оларды жүйелі әрі түсінікті етеді.

Аудиторияның ерекше қызығушылығын меншік құқығы мен экологиялық жауапкершілікке қатысты өзгерістер тудырды. Меншік құқығына ешкімнің нұқсан келтіруге құқығы жоқ екені және оның мемлекет қорғауында болатыны айтылды. Сонымен бірге оны жүзеге асыру экологиялық талаптарды сақтау және қоршаған ортаға ұқыпты қарау міндетімен тығыз байланысты екені атап өтілді.

«Меншік тек құқық қана емес, сонымен бірге жауапкершілік те жүктейді. Мүлік иелері экологиялық нормалар мен заң талаптарын ескеруі тиіс. Бұл тұрақты даму қағидаттарына және қоғамдағы экологиялық мәдениетті қалыптастыру үрдісіне сәйкес келеді», – деді баяндамашы.

Оның айтуынша, болашақ дәрігерлер мен медицина пәндерінің оқытушылары үшін конституциялық нормаларды білу тек теориялық емес, практикалық маңызға да ие. Өйткені медицина қызметкерлерінің кәсіби қызметі адам құқықтарын қорғаумен, пациенттердің қауіпсіздігін қамтамасыз етумен және заң талаптарын сақтаумен тікелей байланысты.

Кездесу аясында медициналық білім беруді жетілдіру, жоғары білікті кадрлар даярлау және медициналық қызмет сапасын арттыру мәселелері де қарастырылды. Қатысушылар конституциялық қағидаттарды іске асыру отандық денсаулық сақтау жүйесінің дамуына, әлеуметтік әділеттілікті нығайтуға және халықтың медициналық көмекке тең қолжетімділігін қамтамасыз етуге ықпал ететінін атап өтті.

Іс-шара қызу пікірталаспен аяқталды. Университет оқытушылары мен қызметкерлері өздерін қызықтырған сұрақтарын қойып, денсаулық сақтау және білім беру салаларында конституциялық нормаларды қолданудың практикалық қырларын талқылап, саланың одан әрі дамуына қатысты пікір алмасты.

Ақпарат: Астана қаласы әкімдігінің баспасөз қызметі