«Таза Қазақстан»: Астанада «Рыскелді қажы» мешітінің маңында экологиялық акция өтті

Астанада «Таза Қазақстан» экологиялық бастамасы аясында «Рыскелді қажы» мешітінде тазалық іс-шарасы ұйымдастырылды, деп хабарлайды елорда әкімдігінің ресми сайты.

«Рыскелді қажы» мешітінің бас имамы, белгілі дінтанушы Нұрлан Байжігітұлы, «Жасыл ел» жастардан құралған еңбек жасақтары және т.б. табиғат жанашырлары тазалық акциясын өткізді.

Аталған игі бастамаға 100-ге жуық адам қатысты. Акция барысында ағаштарды суару, арам шөптерді жұлу және мешіт айналасын абаттандыру жұмысы атқарылды.

Басты мақсаты – қоршаған ортаны қорғауға, жастарды еңбекқорлыққа тәрбиелеуге үндеу. Бастама қоғамдық тазалықты нығайтуға және экологиялық мәдениеттің дамуына ықпал етуге бағытталған.

«Тазалық бір күнде ғана атқарылып қоятын шаруа деп қарауға болмайды. Бұл әрдайым жүзеге асып отыратын ілкімді іс. Мешіт атырабы, тұрғын үйлердің маңайында тазалық жұмысы әрқашан жүзеге асқаны абзал. Айналаның абаттануына, гүлзарлардың, ауланың тазаруына табиғат жанашырлары, жастар да өз үлесін қосты. Еңбекке тартылып, тазалыққа атсалысуға келген жастарға ұлттық құндылық ретінде бата берілді. Экологиялық мәдениетті қалыптастыратын мұндай бастамалар жалғасын тапса нұр үстіне нұр», – деді дінтанушы Нұрлан Байжігітұлы.

#ТазаҚазақстан #экология #TazaChallenge @TazaQazaqstan