Жазғы демалыс кезіндегі қауіпсіздік: полиция маңызды ережелерді еске салды

Астана қаласының полиция департаменті су айдындарындағы қауіпсіздік ережелерін еске салады, - деп хабарлайды Polisia.kz.

Астана қаласының полиция департаменті азаматтарды су айдындарында демалу кезінде қауіпсіздік талаптарын қатаң сақтауға шақырады.

Суға түсу тек арнайы жабдықталған және осы мақсатқа арналған орындарда ғана рұқсат етіледі. Субұрқақтарда, су арналары мен тыйым салу белгілері қойылған аумақтарда шомылуға қатаң тыйым салынады.

Қалалық субұрқақтар ерекше қауіп көзі болып табылады. Олар шомылуға немесе демалуға арналмаған. Субұрқақ ішінде суға түсу жарақат алуға, электр тогының соғуына және өзге де жазатайым оқиғаларға себеп болуы мүмкін.

Балалардың қауіпсіздігі мәселесіне ерекше көңіл бөлінуі қажет. Ата-аналар мен заңды өкілдер кәмелетке толмағандарды қараусыз қалдырмай, олардың субұрқақтарда және суға түсуге арналмаған басқа да орындарда болуына жол бермеуі тиіс. Балалардың қауіпсіздігі ересектердің жауапкершілігі мен қырағылығына тікелей байланысты.

Қазақстан Республикасының қолданыстағы заңнамасына сәйкес, кәмелетке толмағандарды тәрбиелеу және олардың қауіпсіздігін қамтамасыз ету жөніндегі міндеттерді тиісінше орындамаған ата-аналар мен заңды өкілдер заңда көзделген жауапкершілікке тартылады. Полиция тұрғындарды қауіпсіздік талаптарын сақтауға, өз өмірі мен денсаулығына жауапкершілікпен қарауға шақырады.

Ақпарат көзі Polisia.kz